‘डीपसीक’को प्रभावले टेक जायन्टहरुले एकैदिनमा १ ट्रिलियन डलर गुमाए
(एपी)
मंगलवार, २०२५ जनवरी २८,बेलुका ८:२६ बजे
महत्त्वपूर्ण अमेरिकी प्रविधि कम्पनीहरू Nvidia, Microsoft, र Tesla ले सोमबार एकै दिनमा १ ट्रिलियन डलरको बजार मूल्य गुमाए। यो घाटा चीनको उन्नत कृत्रिम बुद्धिमत्ता (एआई) स्टार्टअप ‘डीपसीक’ को उदयसँग जोडिएको छ।
विश्वकै सबैभन्दा धनी कम्पनीको रूपमा चिनिएको Nvidia ले आफ्नो बजार मूल्यको १७% अर्थात् ५८९ अर्ब डलर गुमायो। यो अहिलेसम्मको एकै दिनमा भएको सबैभन्दा ठूलो बजार घाटा हो।
‘एआई को स्पुतनिक क्षण’
प्रविधि लगानीकर्ता मार्क आन्द्रेसेनले चीनबाट सुरु भएको ‘डीपसीक’ लाई “एआई को स्पुतनिक क्षण” भनेका छन्।
“चीनको ‘डीपसीक’ घोषणा वित्तीय रूपमा अमेरिकी बजारलाई लक्षित गरिएको क्षेप्यास्त्रको जस्तै थियो,जुन यथार्थमा झनै नाजुक छ,” आइल्यान्ड क्यापिटल इन्भेस्टमेन्ट्सका सीईओ एन्थोनी एस्पोसिटोले भने।
डीपसीकको तुलनात्मक रूपमा सस्तो र उन्नत एआई विकास गर्ने क्षमताले अमेरिकी कम्पनीहरूले एआई मा गरिरहेको विशाल लगानी र त्यसको प्रभावकारीतामाथि प्रश्न उठाएको छ।
“मलाई लाग्छ, आउँदो महिनाहरूमा अझै ठूलो गिरावट देख्न सकिन्छ,” एस्पोसिटोले थपे।
‘म्याग्निफिसेन्ट ७’ मा पर्ने अरू कम्पनीहरू—Apple, Alphabet, Tesla, Microsoft, Meta, र Amazon—पनि यो गिरावटबाट अछुतो रहेनन्। Alphabet ४% भन्दा बढीले घट्यो, Tesla २%ले तल झर्यो, र Microsoft ले २% को गिरावट भोग्यो।
‘स्टारगेट’ साझेदारीको घोषणा
बुधबार, अमेरिकी राष्ट्रपति ट्रम्पले OpenAI, Oracle, र SoftBank को साझेदारीमा ५०० अर्ब डलरको नयाँ ‘स्टारगेट’ नामक परियोजनाको घोषणा गरे।
“डीपसीकसँग अमेरिकी हाइपरस्केलरहरू जस्तै ठूलो कम्प्युटिङ स्रोत छैन, तर पनि यस्तो प्रतिस्पर्धात्मक मोडेल विकास गरेको छ,” रेमन्ड जेम्सका सेमीकन्डक्टर विश्लेषक श्रीनि पाज्जुरीले सोमबार आफ्नो टिप्पणीमा लेखे।
डीपसीकको प्रभाव
एसपी ५०० टेक सेक्टरमा सोमबारको गिरावट २०२० सेप्टेम्बरपछिको सबैभन्दा ठूलो हो। Nvidia टेक सेक्टरमा दुई अङ्कले गिरावट आउने आठ कम्पनीहरूमध्ये एक थियो।
Oracle का सीईओ लेरी एलिसनको सम्पत्ति सोमबार २७.६ अर्ब डलरले घट्यो। यद्यपि, एलिसन अझै पनि २०० अर्ब डलर बराबरको सम्पत्तिका साथ संसारकै धनी व्यक्तिहरूमध्ये पर्छन्।
यसैगरी, Nvidia का सीईओ जेन्सेन हुआङको सम्पत्ति पनि २०.८ अर्ब डलरले घटेर १०३.६ अर्ब डलरमा झर्यो।
डीपसीकको आलोचना
अमेरिकी प्रतिनिधि सभा चीन चयन समितिले सोमबार डीपसीकको कम्युनिस्ट चीनसँगको सम्बन्धलाई आलोचना गरेको छ। समितिले X (पूर्व ट्विटर) मा पोस्ट गर्दै भनेको छ, “डीपसीकको च्याटबट चीनका कानुन, नियम र समाजवादी मूल्यमान्यतालाई पालन गर्न डिजाइन गरिएको छ।”
सर्वाधिकार सुरक्षित। २०२५।